युरोप शाखाको अधिवेशन वैधानिक हो । कार्यसमिति अधिवेशनले चयन गरेको हुनाले स्वतः वैधानिक हो । पदाधिकारी चयन अधिवेशनकै म्यान्डेट अनुसार निवर्तमान अध्यक्षको संयोजनमा शाखा कार्यसमितिको वैठकले गरेको हो । त्यसलाई केन्द्रले मान्यता दिएको हो, अन्यथा नठहरुञ्जेल शाखा, यसका पदाधिकारी र विगतदेखि अधिवेशनमा कायम रहेका सदस्यको वैधानिकतामाथि केन्द्रले प्रश्न उठाउने कुरा भएन । त्यसपछि एकजना पनि सदस्य थप गरिएको छैन । विगतका सदस्यको छानवीनको जिम्मा अधिवेशनले जसलाई दिएको छ, उसले प्रमाणित गर्न सकेमा त्यही बेला केन्द्रले उचित निर्णय लिनेछ ।
नेपाल पत्रकार महासंघले यसका दस हजारभन्दा बढी सदस्यमध्ये दुई वर्षे पछिल्लो अवधिमा १३५ जनालाई आईएफजे कार्ड प्रदान गरेको छ, त्यस सूचीमा युरोपको एक जना पनि छैुन । अर्थात् एफएनजेले त्यहाँका लागि आइएफजे कार्ड जारी गरेको छैन । ब्रसेल्स अफिसले दिएको आइएफजे कार्ड तपाईले समाचारमा लेखेजस्तो रक्सी, प्लेन टिकट र उपहारमा साटिएको भए, आइएफजेले जानोस्, जवाफ पनि उसैले देओस् । मलाई त्यसमा विश्वास छैन ।एफएनजेले सदस्यता दिएपछि उसलाई एफएनजेको कार्ड दिने कुरा कुनै आश्चर्यको विषय भएन, दिएको भए पनि स्वाभाविक हो । महासंघ गौरवमय इतिहास र उज्जवल भविष्य भएको संस्था हो । त्यसको वैधानिकता, इज्जत, प्रतिष्ठा र पद अनुकूलको आचरण गर्न सक्दो प्रयास गरिएको छ, यस सन्दर्भमा यहाँले प्रदान गर्नुभएको सुझावका लागि धन्यवाद छ । बस यत्ति नै, बाँकी कुरा जुन स्तरमा लेखियो त्यही स्तरमा जवाफ फर्काउन संस्कारले दिएन । धन्यवाद ।