स्विजरल्याण्डको सेन्ट मेरिज क्षेत्र हिमाली भेग हो । यहाँ धेरै चुचुरा छन् । जाडोयाममा हिउँले ढाकिँदा यो क्षेत्र अन्टार्कटिक महादेश जस्तो हिउँनै हिउँको राज्य जस्तो लाग्छ । हो त्यहि हिमाली क्षेत्रमा बस्थे  नेपाललाइ कर्मथलो बनाएका भौगोलिकबेत्ता, इतिहासकार, समाजशास्त्री टोनी हेगन । त्यहि क्षेत्रमा पर्छ तस्विरमा देखिएको हिमाल । हेर्दा यो हाम्रो धौलागिरी हिमाल जस्तो देखिन्छ । हाम्रो धौलागिरी भन्दा निकै होचो भएपनि यो हेर्दा हाम्रो धौलागिरी जस्तो छ । त्यसैले टोनी हेगनले यसको नाम स्विस धौलागिरी राखेका थिए । उनी यो नाम आफ्ना इष्ट्रमित्र र अन्य स्विस नागरिकहरुलाई सुनाउने गरेको उनैकी छोरी मोनिका हेगनले बताईन् ।

यो अर्को चाहिँ हाम्रो माछापुच्छ्रे जस्तै छ । साँच्चै झट्ट हेर्दा त यो हिउँ पग्लिएर नांगिएको हाम्रो माछापुच्छ्रे जस्तै देखिन्छपनि । यसको टुप्पो जुन पूर्वतिर फर्किएको छ, हाम्रो माछापुच्छ्रेको माछाको पुच्छर जस्तै छ ।

स्विजरल्याण्डको मिदी क्षेत्रमा पर्छ यो । यसलाई माछापुच्छ्रे भनेर प्रचार गरेको चाहिँ नेपालमा अनुसन्धान गरेका, पुस्तक लेखेका पाथ्रिक जनेनले हो । उनी यसलाई माछापुच्छ्रे भनेर नाम दिँदै छन् सामाजिक सञ्जालमा ।  जे होस् यिनले नेपालकै नामलाई यता लोकप्रिय गराउँछन् । स्विस नागरिकबिच नेपाल अझै चिनिन्छ । नेपाललाई फाइदानै हुन्छ । र के थाह न कुनै दिन यि दुई हिमालको नाम स्विस माछापुच्छ्रे र स्विस धौलागिरीनै पो राखिन्छन् की  अधिकारिक रुपमै । र यि दुई हिमाललाई हाम्रा हिमालसित मित लगाइदिने दिन पो आउँछ की !