सिँगारपटार गरेका हात्ती पिकनिकमा ब्यस्त

• योगेश अधिकारी / सौराहा, चितवन

एकाविहानै सौराहाका हात्तीहरुलाइ चटारो थियो । किनकि श्रिंगारकर्ताहरु अनेक थरि रङ लिएर तिनका अगाडि उभिएका थिए । तिनले साना पोकाबाट भटाभट रङ निकालेर श्रिंगारपटार गरिदिन थाले । हात्तीहरुले सन्चो मानिमानि तिनका माहुतेको निर्देशन स्विकारे । किनभने तिनलाई राम्रो बनेर पिकनिकमा जानु थियो । हात्तीहरुको आफ्नो समूहबिच सबैभन्दा राम्रि बनेर देखिनु मात्रै थिएन, प्रतिस्पर्धानै जित्नु थियो । सौराहाका पर्यटन ब्यवशायीहरुले हात्तीहरुकालगि पिकनिकको आयोजना गरेका थिए । हात्तीहरुबिच को राम्री बन्ने भन्ने ‘सुन्दरी प्रतियोगिता’आयोजना गरेका थिए ।

हिजोबाट चितवनको सौराहामा तेह्रौं सौराहा महोत्सव शुरु भएको छ । सौराहाका पर्यटन व्यवशायीहरुले आफ्नो पर्यटकिय क्षेत्रलाई अन्तर्राष्ट्रिय स्तरमै अझ बढि चिनाउन यस्तो महोत्सव आयोजना गर्दै आएका छन् । यहि महोत्सवमा तिनले गाढा दौड, हात्ती सुन्दरी प्रतिस्पर्धा जस्ता रोचक खेलहरु राखेका छन् । महोत्सवमा हात्तीहरुको सामूहिक पिकनिक गराउने कार्यक्रमपनि थियो ।

अन्य वर्षहरुमा भन्दा यो पटक हात्ती पोलो खेल थपिएको थियो । हात्ती पोलो खेल निकै रोचक हुन्छ । ठ्याक्कै फूटबल खेलमा जसरिनै पोल हुन्छन् । फूटबल खेलमा जस्तै दुबैतिर खेलाडीहरु हुन्छन् । फूटबल भन्दा अलि सानो भकुण्डोलाई हात्तीमाथि बसेका खेलाडीले लठ्ठीको सहायताले छक्याउँदै लगेर गोल गरिन्छ ।

आयोजकहरुले  सौराहाभरिका हात्तीहरुलाई पिकनिक दिएका थिए । पिकनिकमा केरा, सुन्तला, उखु लगायत हात्तीहरुले रुचाउने अन्य फलफूल र खाद्दान्नहरु टन्न राखिएका थिए । श्रिंगारिएका हात्तीहरुले तिनका धोक्रे भूँडी भरिउन्जेल टन्न खाए । रमाए ।

उद्घाटनका क्रममा चितवनका आदिवाशी थारुहरुले आफ्नो परंपरागत पहिरनमा झाँकि देखाए ।

महोत्सवमा बयल गाढा दौड प्रतियोगितापनि आयोजना गरिएको थियो । जसको गाढालाई गोरुले सबैभन्दा छिटो दगुराउन सक्छ उसैले प्रयोगिता जित्ने नियम थियो ।

हात्तीको पिकनिक हेर्न नेपालका बिभिन्न ठाउँ र अन्य देशका पर्यटककोपनि भरिभराउ थियो ।

महोत्सवको उद्घाटन पर्यटन मन्त्री  जिवन कुमार शाहीले गरेका थिए । समाजमा उल्लेखनिय योगदान गरेको भन्दै नेपाली कांग्रेसका लोकप्रिय नेता बाबुराम पुरीलाई सम्मान गरिएको थियो ।