रहस्यको अर्थ
-राम प्रसाद घिमिरे / सालझण्डी-७, रुपन्देही
माइक्रोसफ्ट कम्पनीको वरिष्ठ मेनेजर
पद, प्रतिष्ठा र प्रियसी छाडेर
सुख खोज्दै बाहुनडाँडासम्म आउनुको राज ?
सेवा रोपेर सन्तुष्टि फलाउने ज्ञान ।
°°°°°°°°°°°°°°°°°°°°°°°°°°°°°
मरुभूमिमा तिर्खाले छटपटिएका राजाले
वैभवशाली विशाल राज्य
एक गिलास पानीसँग साटिएको अर्थ ?
ब्यत्ति वा बस्तुको आ-आफ्नै महत्व ।
°°°°°°°°°°°°°°°°°°°°°°°°°°°°°
सदियौ देखिको भव्य दरवारमा सुरक्षित
अरबौं दौलतको प्रतिष्ठित परिवार
मध्यरातमा एक चिहान हुनुको रहस्य ?
दौलत र प्रतिष्ठाको चरम मोह ।
°°°°°°°°°°°°°°°°°°°°°°°°°°°°°
सानैमा पोलियोको शिकार भएकी महिला
सपाङ्ग संगको ओलम्पिक प्रतिष्पर्धामा
स्वर्ण पदककी धाविका बन्नुको परिणाम ?
दृढ संकल्प, दृढ अभ्यास, दृढ विश्वास ।
°°°°°°°°°°°°°°°°°°°°°°°°°°°°°
आजीवन एकाकारको आशिर्वाद माग्दै
अपलक प्रार्थना गरिरहेकी प्रेमिकालाई
मंन्दिर भित्रै हत्यागर्ने कलङ्कको कारण ?
धर्म र धार्मिकताको निरन्तर विनास ।
°°°°°°°°°°°°°°°°°°°°°°°°°°°°°
घनघोर गरिबीको भार थेग्न नसकेर
पुरै परिवारको सामुहिक आत्महत्या
राष्ट्रिय समाचारमा छाइरहनुको नतिजा ?
राज्य विहीनताको चरम पराकाष्ठा ।
°°°°°°°°°°°°°°°°°°°°°°°°°°°°°
तारे होटलहरुमा बालदिवस मनाईरहँदा
मक्किएर फ्याँकिएको औषधीको थुप्रोमाथी
उपचार नपाएर मरेको बालकको लास ?
एक्काइसौं सताब्दीको मानव अधिकार ।
°°°°°°°°°°°°°°°°°°°°°°°°°°°°°
नेपाली झण्डा उचाल्दै राष्ट्रगान गाइरहँदा
खाँटी देशभक्त हुन दौरा सुर्वाल लाइरहँदा
विदेशीको गोटी बनेर राष्ट्रघात गर्नुको अर्थ
पद-पैसाको पर्याय पुँजीवादको अन्तिम पराजय ।
