गजल

-नेपोलियन मरहट्टा

फेरी अर्को भ्रष्टाचारी बस्दैछ त्यो कुर्चीमा

दस टाउके अवतारी बस्दैछ त्यो कुर्चीमा

°°°°°°°°°°°°°°°°°°°°°°°°°°°°°°°°°°

सपथ रूपी वेद पढ्छ झुक्याउँदै जनतालाई,

देश लुट्ने कर्मचारी बस्दैछ त्यो कुर्चीमा

°°°°°°°°°°°°°°°°°°°°°°°°°°°°°°°°°°

गधा धोई गाई हुन्न, नेता कहिल्यै साधु हुन्न,

सर्वभोगी ब्रह्मचारी बस्दैछ त्यो कुर्चीमा

°°°°°°°°°°°°°°°°°°°°°°°°°°°°°°°°°°

बनाउने केही हैन बिगार्ने छ जताततै,

धुर्मुसे झैँ धुन्धुकारि बस्दैछ त्यो कुर्चीमा

°°°°°°°°°°°°°°°°°°°°°°°°°°°°°°°°°°

दूध खुवाएर सर्प पाल्छ सत्ता आफ्नो टिकाउन

एउटा पुरुष स्तनधारी बस्दैछ त्यो कुर्चीमा