बिदेशमा पिकनिक खाएर वालवालिकालाई शिक्षा
तस्बिर-बिजेन्द्र प्रधान / शैलेन्द्र महर्जन, पेरिस
बिदेशमा बस्ने नेपालीहरुले पिकनिक खान्छन् । नाच्छन् । गाउँछन् । हा हु गर्छन् । रमाईलो मनाउँछन् । यो कुनै ठूलो कुरो होइन । तर यो पिकनिक भने अलि फरक छ । आफुले रमाईलो गर्दा नेपालका वालवालिकालाई पनि शिक्षा दिने । सन् १९९४ देखि नेपालका अनाथ वालवालिकालाई बिभिन्न विद्यालयमा राखेर शिक्षा दिँदै आएको फ्रान्सको एभरेष्ट नेपाल एसोसिएसनले त्यसै गर्छ ।
हिजोपनि पेरिस नजिकैको एउटा पार्कमा त्यसैगरि पिकनिक गरायो। नेपाली र फ्रान्सेली नेपालप्रेमीहरु जमघट भए । नेपाली खाना खुवाए सामान्य दस्तुर लिएर । सबै साथीभाई मिलेर हप्तौं अघिदेखि खाना पकाउने, ठाउँ रोक्ने लगायतका काम गरे बाँडीचुँडी । साथी भाई भेटघाट भयो । दुखसुख साटियो । आफुले रमाईलो गर्दा अवसर नपाएका नेपालका वालवालिकालाई पढाउन केहि रकमपनि जोगियो । आफ्नो देशको बारेमा केहि गरौं भन्ने भावना राख्ने हो भने रमाईलो गरेरैपनि केहि रचनात्मक काम गर्न सकिने रहेछ सात समुद्र पारीबाटैपनि भन्ने यो बलियो उदाहरण हो ।
नेपालप्रेमी फ्रान्सेलीहरुको नेपाली कार्यक्रममा आकर्षण त हुन्छ नै, वालवालिका पढाउने रचनात्मक काम भनेपछि झन रमाउँछन् ।
नेपालकालागि भनेर खुलेको यो पुरानो संस्था भएकोले स्वदेशीहरु बढि नै हुने गर्छन् यो संस्थाको कार्यक्रममा ।
नेपाली कार्यक्रममा मेहनत गरेर ध्वजा पताका र नेपालका तस्बिर, बुद्यका फोटा अनि नेपाली झण्डा गाडेर नेपालकै झल्को दिने बनाउँछन् । यसले नेपालको यात्रा संझाउने गर्छ फ्रान्सेलीलाईपनि ।
खाना खाइसकेपछि नेपाली गित र न्रित्यको तरखरमा यूवायूवती ।
आआफ्नो रुचिको खेलमा मस्त थिए सबै । कोहि ब्याडमिन्टन त कोहि फूटबल ।
पाकाहरुको भने भिन्नै संसार थियो । उनीहरु पेताङ्क (वा बुल भन्छन् की मलाई अलि धरमर छ है !) खेल्दै थिए । यस्ता फलामका गोला गोला डल्ला समातेर एउटाको डल्लोलाई अर्कोले परैबाट ट्वाक्क हिर्काएर पर पुर्याउने र आफ्नो नजिक पार्ने यो खेल फ्रान्समा निक्कै लोकप्रिय छ ।
फ्रान्समा क्यारेमबोर्ड खेल्ने चलन त उति छैन नै, तर यि खेलाडी भने दर्जनौं पटक नेपाल जाँदा जाँदा पारंगत भैसकेका छन् ।
यि मुस्कुराउने हुन् बिजेन्द्र प्रधान । पेरिसमा भएका अधिकांश नेपाली कार्यक्रममा सुन्दर तस्बिर खिच्छन् यी । यहाँ फोटो खिच्ने भनेपछि उनको नाम जोडिन्छ ।
(मैले आजको कार्यक्रमको फोटो पठाइदिन एभरेष्ट नेपालका अध्यक्ष दाई शैलेन्द्र महर्जन र बिजेन्द्र दाईलाई आग्रह गरेको थिएँ । दुबैतिरबाट आए फोटा । तर धेरै फोटोका बिचमा छानेर राख्ने क्रममा यि दुई दाईहरुले खिचेका तस्बिर गोलमाल परेछन् । पछि छुट्याउन सकिन । त्यसको लागि क्षमा चाहन्छु-ददि) ।
