खोई तिम्रो वर्गीय प्रेम ?

-रामप्रसाद घिमिरे / सालझण्डी-७, रुपन्देही

कति सुन्दर परिचय थियो तिम्रो

आधी आकास

कोमल नारी

सृष्टिकी जननी

प्रेमकी खानी

धैर्यताकी पहाड

त्यती मात्र कहाँ हो र ?

नारी मुक्ति अनि

पुरै मानव मुक्तिका लागि

मृत्यु वा मुक्तिको कसम खाएर

संर्घषमा होमिएकी योद्धा

क्रान्ति नायककी संगिनी

जनताद्धारा अनुमोदित विरंगना 

°°°°°°°°°°°°°°°°°°°°°°°°°°°°°  

के भयो आज तिमीलाई ?

कहाँ गयो तिम्रो नारित्व ?

किन सुक्यो तिम्रो संवेदना ?

खोई तिम्रो वर्गीय प्रेम ?

खोई प्रतिशोधको मशाल ?

खोई इतिहासको स्मरण ?

तिम्री बहिनी बलात्कृत हुँदा

खुसिले गदगद हुन्छेउ रे

तिम्री छोरीको चीरहरण हेरेर

ताली बजाउँछेउ रे

हत्यारा र अपराधीहरुलाई

निर्दोष बालिकाका बलत्कारीहरुलाई

तक्मा बाँड्दै हिँड्छेउ रे

°°°°°°°°°°°°°°°°°°°°°°°°°°°°° 

आजकल त तिमी

जुन थालमा खायो

त्यही थालमा चुट्छेउ रे

कानुनी राज्यको खिल्ली उडाउँदै

निशाफ माग्नेलाई कुट्छेउ रे

राजनीतिक परामर्स लिन

वर्ग-बैरीकोमा जान्छेउ रे

शिशाको घरभित्र बसेर

सहकर्मीलाई ढुङ्गा हान्छेउ रे

टुप्पामा बसेर फेद काट्छेउ रे

पद-पैसासँग वर्गीय प्रेम साट्छेउ रे ।

°°°°°°°°°°°°°°°°°°°°°°°°°°°°° 

हुँदा हुँदा अव त-

आफ्नै वर्गको खैरो खन्छेउ रे ।

जसको शिकार गरियो

उसैलाई शिकारी भन्छेउ रे ।।