खबरदार ! देशद्रोहीहरु !
-ताराश्वर शर्मा बागलुङ
खुल्ला तर जञ्जिर भित्र, आँखा तर अन्धा जस्तै
स्वार्थी, बाहिर मन्दिरजस्तै, आवेग तर बन्दी जस्तै
राजनीति र जनता बिचमा, किन यस्तै तानातान छ,
एक अर्काको प्रबल निर्बल दुबै फेरी जानाजान छ ।
चरम आक्रोश प्रस्फुटन भो, तैराउनलाई लुक्दै उनै
आशा छिट्टै पूर्ण बिराम, भाषण ठूला फूक्दै उनै ।
फेरी आक्रोश मन्द मन्द, मालामाल झन देशैबेची
आकर्षण र विकर्षणमा जानाजान झनै भेषै बेची ।
राजनीति र जन्ता बिचमा किन यस्तै पैंठे जोरी
सोझाहरु इचाई-मिचाई भन्दै उनी दुबै कुर्ची कुरी ।
उग्रबादमा मिठा नारा, सोझा जनता अतमलमा
नीति बिहिन हुँदै छाडा, रोपाई जस्तै दलदलमा ।
फेरी बिचमा अर्को पसी जनता “वा” मा टोलाऊँदै
सामान्तिले प्रगतिशील स्वरुप पार्दै उनै बोलाऊँदै
राजनीति र जनतामा किन यस्तो दाउपेच हुन्छ
धनीहरुमा खुसी अर्कै, गुहार माग्दै राष्ट्र रुन्छ।
तर अब खवरदार है, ब्यूँझदैछन मजदुर किसान
देश बेच्न टुक्राऊँदै छौ, संघीयताको बनाई निसान।
प्रतिकारमा उठे जनता, ठाऊँ-ठाऊँमा मसाल बाली
बडार्नेछन् छिट्टै अब, देशद्रोही लाई गर्दै खाली ।
दलालहरुहो खबरदार ! सम्झौता लाई बन्द गर
सक्छौ भने अन्धविश्वाश र कुरीतिलाई बन्द गर।
दिन दाहाडै सोझा जनता लुट्न चुट्न बन्द गर,
सामाज्यबाद र बिस्ताबाद लखेट्नलाई बारुद भर।
गाउँ-गाउँ बस्ती-बस्ती गरिब किसान मनदुर जुट्दै
होशीयार देशद्रोही हो ! आँधी फेरी पनि छ फर्किदै।
हात-हातमा मसाल बोकी आन्दोलन छिट्टै चर्किदै
शिरमा आफ्नो कात्रो बोक्दै देशभक्त छन् कस्सिदै ।
-हाल दोहा /कतार ।
