तिनवटै पार्टीका नेता मिलेर यस्तरि ठग्ने जिल्लावासीलाई ?
गत महिना सबै जसो पत्रपत्रीकामा एउटा समाचार आयो-चितवन जिल्लालाई राजधानी बनाईने ! शिर्षक यहि थियो । आफुपनि चितौने परियो । कान ठाडा भैहाले । कतै आफ्नो घरगाउँ राजधानीमा पर्ने भयो कि भनेर । कांग्रेस, माओवादी र एमालेका स्थानिय नेता मिलेर चितवनमा पत्रकार सम्मेलन गरेछन् सबै हिसाबले चितवन राजधानी बन्न उपयुक्त छ भनेर । स्थानिय पत्रपत्रीका, टिभी र एफएम रेडियोहरुले प्रमुख समाचार बनाए । धेरैका दिल हाँसे । निकै रौसिए, लौ हाम्रापनि दिन आउने भए भनेर । अनि तिन दलकै स्थानिय नेता आए काठमाडौं । स्थानिय तहका प्रमुख नेताले आआफ्ना पार्टीका अध्यक्ष वा सभापतीलाई भेट्न नपाउने प्रश्नै रहेन ।
काठमाडौं आएर सबैले आआफ्ना दलका प्रमुखलाई भेटे । राजधानी काठमाडौं अनुपयुक्त भयो । नयाँ राजधानी चितवनलाई बनाउनुपर्छ । यो यो कारणले चितवन नयाँ राजधानी बनाउन उपयुक्त छ भनेर तर्क दिए । राजधानी सार्ने कुरा । प्रमुख दलका नेता आएर आआफ्ना पार्टीका प्रमुखसँग जोडका तोडले तर्क राखेका छन् । त्यसले मेडियाको ध्यान नतान्ने कुरै भएन । फेरि राजधानीमा यसैपनि च्याउसरि एफ एम रेडियो र पत्रपत्रीका छन् । तिनलाई नयाँ नयाँ समाचार चाहिएकै छ । राजधानी नै सार्ने माग राखेको समाचार त भयंकरनै भयो । अनि सारा मेडियाभरि त्यो समाचार आयो ।
जग्गाको भाउ रात र दिनमा चौगुणाका दरले बढ्यो । लौ राजधानी बन्छ भने त भन्दै वरिपरि जिल्लाकापनि हाम्फाल्न थाले । पैसा हुनेहरु जग्गा हेर्न दौडिन थाले । तर त्यो त वास्तबमा सब ठग्नलाई रहेछ । वास्तबिकता के रहेछ भने नेपाली कांग्रेस, एमाले र माओवादी तिन वटै दलका फटाहाहरुले मिलेर सस्तो जग्गा किनेछन् । अनि त्यसलाई फ्लटिङ गरे । बिना दुख र मेहनत तत्कालै करोडपती हुनकालागि उनीहरुले यो जुक्ति निकाले । चितवनलाई राजधानी बनाइने भन्ने समाचार आएपछि दौडधुप गर्दै आउने सोझासाझालाई उनीहरुले महँगो दाममा जग्गा बेचे ‘चितवन त राजधानी बन्ने भो नी’ भन्दै । दाम कमाए ।
हेर्नु त हाम्रा राजनितिक पार्टीहरुको पारा । साँच्चि देश र जनताको लागि सोच्नेहरु एकदम कम छन् । राजनितिक पार्टीमा लागेकाहरु जनताको सेवा गर्ने भावनाले होइन कि कमाउन, ठग्न, रातारात करोडपती बन्न, पद हात पार्ने उद्देश्यले लागेका छन् । तिनको ध्याउन्ना जसरि हुन्छ जनतालाई ठग्ने हो ।केन्द्रका नेताहरु बेठिक भएपछि तल्लो स्तरका नेता कसरि गतिला हुने ? केन्द्रिय नेताको दाउनै ठग्ने छ। देशलाई चुस्ने छ । ढाँट्ने र छल्ने छ । नागरिक प्रति जिम्मेवार छैनन् । अनि तिनले बनाएका कार्यकर्ता कस्ता हुने ? केन्द्रिय नेतालाईनै देश र जनता चुस्न फूर्सद छैन अनि तिनले कसरि स्थानिय नेता कार्यकर्ताको निगरानी गर्ने ?
