कविता- ‘यौटा बौलाहा क्रान्तिकारी !’

• प्रदीप अधिकारी (आक्रोश)

द्रव्यसँग बिकाउ जमातमा नैतिकता खोज्दै,

मानव नै बेच्नेहरूको भीडमा मानवता खोज्दै,

यसै-यसै भुतभुताउँदै

मुर्दामा आत्मा खोज्दै थियो खोतली-खोतली-

यौटा बौलाहा क्रान्तिकारी !

अँधेरी रातमा आशको किरण देखाउने

थचक्क थेचिएका मनलाई उठ्न घच्घच्याउने,

ती स्वनामधन्य क्रान्तिनायकले,

आज रातारात बाटो मोडे, हुँदा-खाँदाको नाता तोडे,

फगत् आफूलाई बाट्ठो प्रमाणित गर्न तिन्ले

ब्वाँसोसँग हाँसो गाँसे अनि

सर्पसँग चर्म साँटे

जिन्दगी नै डुंगाजस्तो बनाइसकेका तिन्ले,

चटक्कै बिर्सिए-

उनको सिंढीमा,

ज्यान बलिदानी दिई कुप्रुक्क परेर

फगत् खुड्किला बन्न बाध्य सपुतहरू

देशका खोला र कन्दरामा आलै रहेका-

ढलेका शरीर अनि बगेका रगतहरू

अझै,

मरेका आफन्तको परत्र सुधार्ने ढोंगमा

मृत शरीर पछि बुर्की छर्दै हिंड्ने सन्तान सरह

वादको रट र पदको मातमा धुत्त हुँदै

उनी बुट्टेदार शब्द बुर्क्याउँछन्

कैले घुच्चुकमा चढेर टाउकोमा बजार्ने भन्दै मन भड्काउँछन्

कैले निरन्तरतामा क्रमभंगता भन्दै आफ्ना बिच्काउँछन्

कैले मित्र शत्रु र वर्ग शत्रुको परिभाषामा पुराण भट्ट्याउँछन्

अनि निमेषभरमै मित्र र शत्रुकै भेउ नपाए झैँ जगत लर्बऱ्याउँछन्

यता भित्र लेनिन झैँ गर्जिन्छन् अनि

उता बाहिर ख्रुसचेव झैं लत्रिन्छन्

तरैपनि

त्यहि चिस्सिएको चितामा बलिदानी राप खोज्दैछ-

यौटा बौलाहा क्रान्तिकारी !

++++++++++++++++

तिनै,

खग्रास भै डढेका अनि बुङ्ग खरानी उडाइरहेका बस्तीले,

ढलेका प्रत्येक ओत अनि उनेका प्रत्येक चोटहरूले

बुर्कुसी मार्दैछन् मन र मथिङ्गलमा

लाग्छ-

उक्साएर थचारिएकाअँधेरा बस्तीमा,

तिनिक्क तानेर झ्वाट्ट छोडिएको आश-

मनले बिस्तारै तुहाउँदैछ ।

तबैपनि

परे बरू दुस्साहासी उग्रवादीको बिल्ला भिर्न तयार भै

निभेको दियो जलाउने रहरमा,

पिल्पिलिएको घाऊमा मल्हम लगाउने ध्येय लिई,

जुर्मुराउने मेलो खोज्दैछ !

यौटा बौलाहा क्रान्तिकारी !

+++++++++++++

तिमी त बाटो फेरेर समाजवाद हाँकेको मान्छे,

ढलभन्दा बढि ढल्किएर ,

चुलो पसी डाडु चाट्न पल्किई

जनवाद देखाउँदै धनवाद ताकेको मान्छे

सायद

तिम्रा मानसपटलबाट लगभग हराइसके-

ती जलजलामा जेलिएका माया अनि

सिस्नेमा सुस्ताएका छायाँहरू,

तर अझै सपना नदेख्न नसकी

मरेको मन ब्युँझाउने रहरमा,

आज फेरि बस्ती छिरेको छ-

यौटा बौलाहा क्रान्तिकारी !

+++++++++++++++

गुरू तिमी नै थियौ- हौ पनि,

जगाउँदाको आश अनि

भगाउँदाको घात ताजै रहेको मन बोकी

तिम्रै शिक्षणको भरपुर उपयोग गर्दै

तिम्रा रकमी समाजवादको महल पड्काउन

सुतली बम उन्दैछ-

यौटा बौलाहा क्रान्तिकारी !

++++++++++++

लाग्छ कुनैदिन

तिम्रा पहरेदार र नोकरका घेरा अनि

आवश्यक पर्ने सम्पूर्ण तार-बार तोडी

तिम्रो नाकै अगाडि तिम्रो भूत देखाउँदै

हातमा बमको रिमोट लिएर ठिङ्ग उभिनेछ-

यौटा बौलाहा क्रान्तिकारी !