कविता : वर्ष पुरुष
- कपिल अधिकारी / ताइवान
गौंडाबाट तल हेर्छ गोबिन
टहरामा छैनन् स्कुले
टहरा पनि भर्खर बनेको ,भुइचालो पछी
भुरा भुरी , तन्नेरी आँगन अगाडी छन् मान्द्रोमा
बसीबियाँलो
++++++++++++++++++++
नजिकैको अस्पतालमा ओखती छैन
डाक्टर यसो भन्छन
तर बिमारीको लाइन भने छ
ओखती आउन पाएन रे
++++++++++++++++++++
बजारमा केहि छैन
केहि पाइंदैन
ढुंगेमा फाट्टफुट्ट लरी , बस देखिन्छ इन्टेकबाट
बरु केरुंगबाट झरेका केहि राताट्रक सुस्ताएका छन्
त्रिशुली दक्षीण बगी रहेछ
मान्छेका मन भने उत्तर तिर , र आँखा
भृकुटी बिदाईको बाटो, छ चहल पहल
++++++++++++++++++++
साततले ख्रीसिक्क परेको छ
लुगा फेर्न नपाएर होला दशैंमा
चिया दोकानमा चियाको राउण्ड छ
स्टक सकिनै लाग्यो रे
++++++++++++++++++++
दोभान जाने मलामीको मात्र दाउरा छ अँगालो भरि
सुन जस्तो छ दाउरा
गोबिन सुन्छ
सब बन्द छ रे शहरमा झन्
भर्खरको हमलाले
पेरिस,बेरुत , केन्या छाएको छ समाचारमा
ब्रेकिंग न्युज छ
आतंक र आतंकबादीबारे टिभीमा बहस
++++++++++++++++++++
वर्ष सकिनै लाग्यो
यस वर्षको शक्तिशाली व्यक्तित्व,वर्ष पुरुषको
लामै लिस्ट छ म्यगाजिनमा
गोबिन सोच्छ
आतंककारी वर्ष पुरुष पनि हुने भएको भए
यस वर्षको कस्लाई दिँदा हुन् ?
++++++++++++++++++++
के सम्झेर उ मुसुक्क हाँस्यो
पोहर त हो, उसले उसको भासण टिभीमा हेरेर
मच्ची मच्ची टेबल ठोकेथ्यो
आज,
आँफैसंग लाज लाग्यो
“दि टेरोरिस्ट : म्यान अफ द इयर” |
