आमा !
-लक्ष्मी सापकोटा, बेलायत
आमा
आमा, माता , जननी के भनौ तिमीलाई
तिम्रो ममताको कुनै सिमा छैन
मात्रिस्नेह र करुणाकी खानी तिमी
सन्तानकी प्रेरणा श्रोत बनिदेऊ । ।
आमा !
यस्ता सन्तान जन्माइ देऊ तिमी
जो आज भत्केर बिग्रदै गरेको संसारलाई
पुन: निर्माण गरिदिऊन्
जिर्ण भएका भग्नावशेषलाई नयाँ रूप दिन
संसारमा नयाँ जग गरिदिऊन्
तिमी प्रेरणा रुपी खम्बा भएर उभिइदेऊ । ।
आमा !
आफ्ना सन्तानलाई सुसंस्कार र भाईचारा सिकाइदेऊ
ताकी भाई भाई युध्दमा रगतको खोलो नबगोस्
सुन्तली र चमेलीहरुका सिउदो नपुछिऊन्
काले र पोक्चीहरु टुहुरा नहोउन्
तिमी सुसंस्क्रितीकि शिक्षिका बनिदेऊ । ।
आमा !
आफ्ना सन्तानलाई यस्तो बिद्या देऊ
जसले संसारको अन्याय र अत्याचार हटाउन
गरीब र निमुखाको वकालत गरुन् अनि
अन्यायको बादल हटेर सुशासनको नयाँ बिहानी उदाओस्
तिमी न्याय मुर्ती भएर खडा भइदेऊ । ।
आमा !
सन्तानको मन मष्तिष्कहरु सद्भावले भरिदेऊ
जस्ले युध्दले क्षत् बिक्षत् भएका बस्तिहरुमा
सद्भाव र आशाका मैनबत्तीहरु बाल्न सकुन्
भत्किएका मनहरुमा आशाको दियो जगाईदिऊन्
तिमी सन्देशवाहक दूत बनिदेऊ । ।
(आमाको मुख हेर्ने दिनको उपलक्ष्यमा विश्वभरिका आमाहरुको संझनामा लेखिएको हो यो गित-लेखिका) ।
