बोक्सी भन्दै दिसा पिसाब खुवाउनेलाई कारवाही नगर्ने ?

हाम्रा नेता भनाउँदाहरुले भाषणमा जातभातको अन्त्य उहिल्यै भनेका हुन् । धर्म निरपेक्षता भनेर सहि धस्काएर के भयो ? संबिधानको खोस्टोमा सारा जनता समान भनेर लेख्दैमा पो भयो के ? त्यो मान्यता हाम्रो शामान्तवादी हिन्दू संस्क्रिति र संस्कारबाट अझै हटेको छैन । संबिधानका खोस्टामा फ्यास्स लेखिदिँदैमा मानिसको मन र मस्तिस्कबाट हट्दैन । त्यसलाई उल्लंघन गर्नेलाई समाजमा कडा कारवाहि गर्नुपर्छ । अनि गर्नुपर्छ बिस्तार शैक्षिक र जन चेतना फैलाउने कार्यक्रम । सरकारको जहाँ पायो त्यहाँ सहि मात्रै धस्काउने त्यहि लाचारीपनका कारण समाजमा बोक्सीको अरोपमा दिसा पिसाब खुवाउने र यातना दिने घ्रिणित र मानवता बिरोधी काम भैरहेका छन् । यस्तै घटना भएको थियो ललितपुर जिल्लाको प्युटार गाबिस, ७ थाङसिङ टोलमा । त्यहाँकि ४५ वर्षिय कल्ली कुमारी विकलाई गत चैत्र ७ गते कुटपिट गरेर दिसापिसाब खुवाइएको थियो । त्यो खुवाउनेपनि बढि भञ्ज्याङ प्राथमिक स्कूलकि प्रधानाध्यापिका विमला थापा । सारा जगतले उनीमाथि कर्वाहि गर्नुपर्ने माग गर्‍यो । तर उनीमाथि अहिलेसम्म कारवाहि भएको छैन । उनले उजूरि गरिन त्यो दानव प्रधानाध्यापिकालाई पक्रेर कारवाही गर्न । तर नेपालका प्रहरीले त्यस्ता जन्तुलाई देख्दैनन् । नेपालको प्रशासनको आँखा फुटेको छ । विवेक गुमेको छ । उसलाई संबिधानमा समान लेखिदिए पुगेको छ जनताले त्यसको अनुभव गर्नु परेको छैन ।

सरकारले आग्रह, अनुनय, छलफल, कानुनको पालना र नागरिक प्रतिको दायित्व बिर्सेपछि हुन्छ के ? भवन जलाउने । बाटाका रेलिङ भाँच्ने । गाडी फुटाउने, आगो, धुवाँ र ज्वाला दन्काएर देश ठप्प पार्ने । ‘लातोका भुत बातोसे नहि मान्ती है‘ भने जस्तो अशान्ति नमच्चाएसम्म सरकारले सुन्दैन पिडितका बेदना । त्यहि भएर होला ति अत्याचारीलाई कारवाहि गर्नु पर्‍यो भन्दै दलित महिला संघ जुर्मुराएको छ । आज संघले आज ति दोषीलाई करवाहि गर्नु पर्ने र त्यसो नगरे सम्पूर्ण दलित महिला लगायतका संघ संस्था कडा संघर्षमा उत्रिने चेतावनी दिएको छ । संघले आज जारी गरेको प्रेस बिज्ञप्ती हेर्नुस जस्ताको तस्तै ।

प्रेस–विज्ञप्ति

मिति २०६६/०१/०७

ललितपुर जिल्लाको प्युटार गाउँ विकास समिति वडा नम्बर ७, थाङसिङटोलकी ४५ वर्षी कल्लीकुमारी विकलाई बोक्सीको आरोपमा गएको चैत ७ गते कुटपिट गरी दिसासमेत खुवाइएको सर्वविदितै घटना हो । एउटी दलित महिलालाई गढीभञ्ज्याङ प्राथमिक विद्यालयकी प्रधानाध्यापिका विमला लामाले कुटपट गरी दिसा खुवाउँदा सिंगो समाजले समर्थन त गर्‍यो नै, समाजमा न्याय दिन बसेको प्रहरी प्रशासनले समेत अहिलेसम्म दोषीलाई पक्राउ नगरेर घटनाप्रति आफ्नो गैरजिम्मेवारीपना देखाएको छ । गएको चैत १० गते कल्लीकुमारी विकले स्थानीय आस्राङमा रहेको इलाका प्रहरी कार्यालयमा न्यायका लागि उजुरी दिएको भए पनि अहिलेसम्म घटनाका अभियुक्तहरुलाई प्रशासनले पक्राउ गर्न सकेको छैन ।

दलित महिला संघलगायत दलित समुदायको अधिकारको क्षेत्रमा काम गर्ने विभिन्न संघ–संस्थाहरुले सामूहिक रुपमा घटनामा संलग्न दोषीहरुलाई पक्राउ गर्नुपर्ने र पीडितलाई उचित क्षतिपूर्तीसहित पुनर्स्थापना गरिनुपर्ने विषयमा यसअघि नै सरकारको ध्यानाकर्षण गराइसकेका छौं । घटनाको बारेमा छानबिन गर्नका लागि व्यवस्थापिका संसद्, महिला बालबालिका तथा समाज कल्याण समितिले चैत १९ गते सभासद् विनोद पहाडीको संयोजकत्वमा १९ सदस्यीय छानबिन उप–समिति समेत गठन गरिसकेको छ । उप–समितिले अहिलेसम्म प्रधानमन्त्रीलगायत व्यवस्थापिका संसद्का सभामुख, उप–सभामुखलाई घटनाको बारेमा ध्यानाकर्षण गराइसकेको जनाएको छ । छानबिन उप–समितिले शिक्षामन्त्री, महिला अधिकारकर्मी, दलित समुदायको अधिकारका लागि काम गर्दै आइरहेका सरकारी तथा गैरसरकारी संघ–संस्था, कानुन व्यवसायी र पत्रकारहरुसँग छलफल गरिसकेको छ । राष्ट्रिय मानवअधिकार आयोग, राष्ट्रिय दलित आयोग र राष्ट्रिय महिला आयोगले पनि संयुक्त रुपमा ललितपुर जिल्लाका प्रमुख जिल्ला अधिकारी र प्रहरी प्रमुखसँग स्पष्टीकरण लिइसकेको जनाएका छन् । प्रधानमन्त्री पुष्पकमल दाहाल प्रचण्डले प्रधानमन्त्री राहत कोषबाट २५ हजार रुपियाँ राहत स्वरुप उपलब्ध गराउने आश्वासन दिनुभएको छ ।

बोक्सीको आरोपमा यातना दिने र मलमूत्रसमेत खुवाउने यस किसिमका मानवताविरोधी, घृणित र निन्दनीय घटनाहरु हाम्रो समाजमा बारम्बार भइरहेका छन् । त्यसमा पनि दलित समुदायका महिलाहरु बढी पीडित हुनुपरेको छ । घटनाका दोषीहरुलाई अहिलेसम्म कारबाही नहुनुले दण्डहीनताले थप प्रश्रय पाउँदै गएको दलित महिला संघको ठहर छ । त्यस्तै विभिन्न मानवअधिकारकर्मीहरुको पनि यसप्रति चासो नदेखाएका हुन् कि भन्ने हामीलाई लागेको छ । अहिले माइती नेपालमा रहनुभएकी पीडित कल्लीकुमारी विकले घर फर्किने वातावरण बनाइदिन आग्रह गर्नुभएको छ । यस्तो अवस्थामा घटनामा संलग्न दोषीहरुलाई पक्राउ गरी तुरुन्त कडाभन्दा कडा कारबाही गरी पीडितलाई क्षतिपूर्तीसहित सुरक्षित एवम् स–सम्मान गाउँ फर्किने वातावरण तयार गर्न सरकारसँग दलित महिला संघ जोडदार माग गर्दछ ।

पीडितलाई न्याय दिलाउनका लागि सक्रिय पहल गरिदिन सम्पूर्ण नागरिक समाज, मानवअधिकारकर्मी, कानुन व्यवसायी, राजनीतिक दल, सभासद्, सञ्चारकर्मीलगायतलाई दलित महिला संघ पुनः आहृवान गर्दछ । दोषीलाई छिटोभन्दा छिटो कारबाही नगरिए दलित महिला संघ–लगायतका संघ–संस्थाहरु सशक्त संघर्षमा उत्रिनेसमेत यसै पत्रकार सम्मेलनमार्फत दलित महिला संघ जानकारी गराउन चाहन्छ ।