गजल : अस्मिता
- डा हरि कुमार श्रेष्ठ / स्युचाटार, काठमाडौँ
लुटिँदैछ अस्मिता चेलीको आज
परेर फन्दामा त्यो झेलीको आज ।
+++++++++++++++++
नर पिशाच कस्तो शक्तिले बेर्दै,
लिँदै पो छन् सुगन्ध बेलीको आज ।
+++++++++++++++++
राज छ एकछत्र शासन कब्जा,
छैन भर कानूनी ठेलीको आज ।
+++++++++++++++++
सहाराको खातिर खोज्दै समाज,
छैन कोही मित्र अकेलीको आज ।
+++++++++++++++++
बगरको बिस्कुन बनाए कस्तो,
सुकाई यौवन सहेलीको आज ।
+++++++++++++++++
थियो कस्तो मुहार टल्कने रङ्ग,
मूल्यहीन बनाए सेलीको आज ।
+++++++++++++++++
अश्रुधार तप्कँदै पागल रुप,
दुर्दशा बन्दैछ चमेलीको आज ।