कविता : आमा तिम्रो नाम के हो ?
● लक्ष्मी माली
हजुरबा छोरी भन्नु हुन्छ
मामा दिदी भन्नु हुन्छ
बाबा श्रीमती भन्नु हुन्छ
म आमा भन्छु
आमा तिम्रो नाम के हो ?
००००००००००००
म बिद्यालय गएँ
महाविद्यालय गएँ
त्यहाँ तिम्रो नाम चाहिएन
धेरैलाइ परिचय दिएँ
कसैबाट तिम्रो नाम सोधिएन
म बालिग भएँ
मताधिकार पाएँ
मेरो परिचयपत्र मा तिम्रो नाम लेखिएन
००००००००००००
म नागरिक भएँ
बाबुकै नाम बाट
म जागिरे भएँ
बाबुकै नामबाट
म बेनाम आमाकी छोरी
भन आमा तिम्रो नाम केहो ?
कसैबाट सोधनी नभएको
कतै उच्चारण गर्न नपरेको
तिम्रो नाम
सार्बजनिक गर्न चाहन्छु म
धर्ति भन्ने उपनाम होइन आमा
मलाई तिम्रै नाम चाहिन्छ
आमा तिम्रो नाम केहो ?
(धेरै पाठकले रुचाएको ‘आगो‘ कविता संग्रहको एक टुक्रा)
