शासक बिहिन भएको छु
-नेपोलियन मरहट्टा-
जिउँदा लाशहरु बस्ने
त्यो मशानघाटको सिंहदरबारको
सुनै सुनको कुर्सिमा जो बसे पनि
यती सजिलै म तिमीलाई
आफ्नो शासक मान्दिन ।
तिमीले आँफुलाइ शासक ठाने पनि
वास्तवमा,
म कहिल्यै तिमीबाट शासित भइन ।
देश लुट्न,भेष फेरेर आउने
तिमीजस्ता सत्ताधारी जोगीले
निधारमा एक चिम्टी
रातो खरानी दल्दैमा, म कहाँ
तिमीलाई श्री ३ मान्न सक्छु र ?
कान्तिपुरे खाल्टोमा बसी
सिंहदरबार ओहोर दोहोर गर्दैमा
म तिमीलाई कहाँ शासक मान्छु र ?
शहरको गल्ली देखी,गाउँका ति बस्तिहरुमा
कहिल्यै शासन गर्न सकेनौ तिमीले ।
न त, देशको कुनै सिमानाहरुमा नै
शासन गर्यौ ?
भोका,नाङगा र रोगीहरुले पनि
केही पाएनन् तिम्रो सत्ताबाट ।
नत ति पहाड,पर्बतले नै
श्रीँगार पाए तिमी बाट ।
कती नदी, छहरा र खोलाहरु
तिम्रो हातबाट फुत्किएर पश्चिम बगे,
तर, बिडम्बनाको कुरो
बगीजाने एक मुठी पानीमा पनि
शासन गर्न सकेनौ तिमीले ।
अनि,कसरी म तिमीलाई
जंगबहादुर भन्न सक्छु र ?
साँच्चै,यस्तो लाग्छ मलाई,
आजभोली
तिमी सत्तामा आएदेखी त
म देशभित्रै भएपनि
एउटा शासक बिहिन भएको छु ।
तिमी बिहिन भएको छु ।
(साहित्यप्रेमी साथीहरु, तपाईहरुले पठाउनु भएका कविता, गित र गजल मैले समयमै प्रकाशित गर्न सकेको छैन। सक्ने अवस्थानै छैन । किनभने यति धेरै गित र कविता आएका छन् कि प्रकाशित गर्न केहि हप्ता कुर्नै पर्ने अवस्था छ । अहिले मसित कविता र गजल गरेर पाँच दर्जनको थुप्रो छ । एकैदिन सबै राख्न सकिन्न । यो साहित्यिक साईटपनि होइन। मैले त साहित्यको सम्मानार्थ साहित्यिक समाग्रिलाई स्थान दिएको मात्रै हुँ । त्यसैले दुई देखि तिन हप्ता लाग्न सक्छ तपाईको गित, कविता र गजल प्रकाशित हुन । त्यस्तै, केहि साथीहरुको गुनासो अन्यत्रै प्रकाशित भएका सामाग्रिपनि नेपालप्लसमा छापिए भन्ने छ । सप्रमाण मैले फेला पारेको भने छैन । मलाई कुनैपनि सञ्चार माध्यममा प्रकाशित भइसकेको रचना चाहिएको छैन। त्यसैले झुक्काएर त्यसरि नपठाउनु होला। त्यसरि झुक्काएर यहाँ फेरि प्रकाशित गरिएको पाइएमा रचना मात्रै होइन पाठक प्रतिक्रिया लेख्नपनि बन्देज गरिनेछ । गित, कविता र गजलमा मात्रै सिमित नरहेर साहित्य संबन्धि अन्य विषयमापनि कलम चलाउनु हुन अनुरोध छ। सहयोग गर्नु भएकोमा तपाईहरु सबैलाई धेरै धन्याबाद, नेपालप्लस) ।
