गजल
–प्रकाश सापकोटा
मुखले मात्र ठिक्क पार्छन् धोकेबाजहरु
आकाशको तारा झार्छन् धोकेबाजहरु
झुक्याउँछन् छक्याउँछन्, घरि आलेटाले
भोली भोली भन्दै टार्छन् धोकेबाजहरु
पैला मनको अन्तरमा बास मागी मागी
अत्तोपत्तो डेरा सार्छन् धोकेबाजहरु
चोखो मनको मझेरीलाई रुखो बनाएर
स्वार्थको घडेरी खार्छन् धोकेबाजहरु
हार्दिकता देखाएझैं गरि स्वागतले
भित्र भित्रै बार बार्छन् धोकेबाजहरु
नदी तर्ने डुंगा मात्रै पाउनुपर्छ तिनले
आफुलाई मात्र तार्छन् धोकेबाजहरु
बाँच्नलाई सहाराको चाँजो मिलाएर
बचाउनेलाई चाहिँ मार्छन् धोकेबाजहरु
–बनेपा, काभ्रे
हाल: दोहा ।
