फ्रान्समा फेरी नाम चम्काए साङ्गे शेर्पाले
फ्रान्सको दक्षिणी छेउमा बस्छन् शाङ्गे शेर्पा । त्यहिँबाट उनले नेपाल, नेपाली र शेर्पाको नाम चम्काएका छन् । उनले फ्रान्समा गत केहि महिना भएका दौड प्रतियोगितामा सयौं धावकहरुलाई उछिनेर नेपालको नाम चम्काएका हुन् ।
साङ्गेले नेपालप्लससितको सम्पर्कमा आफुले यो वर्ष सहभागि भएका प्रतियोगिता र जितेका सफलताको जानकारि दिए । यो वर्षको शुरुवातसँगै उनले दौड प्रतियोगितामा भाग लिन थालेका हुन् । त्यसो त अघिल्ला वर्षहरुमापनि उनले सयौं प्रतिस्पर्धीलाई उछिनेर थुप्रै दौड जितिसकेका हुन् ।
गत जनवरी महिनामा उनले दुई वटा दौड प्रतियोगितामा भाग लिएका थिए । ति दुबै दौड प्रतियोगिता हिउँमा दगुर्नुपर्ने थिए । हिमाली शेत्रमा जन्मे हुर्केपनि हिउँमै भने उनले कहिल्यै दौडमा भाग लिएका थिएनन् । त्यसैले हिउँमा दगुर्नु उनको लागि पहिलो अनुभव थियो । यो प्रतियोगितामा अन्य धावकहरु भने हिउँमा धावन गरिसकेका अनुभवी थिए । साङ्गेलाई आफु अनुभवहिन भएकालेपनि एकखालको धुकचुक र मनमा त्रास थियो । तर मैदानमा उत्रिसकेपछि उनलाई निकै सफलता मिल्यो । जनवरी १२ मा भएको थ्रेल ब्लँ दु जुरा नामको १७ किमि लामो हिउँमाथिको दौडमा उनी पाँचौं स्थानमा निस्किए ।
पहिलो अनुभवमै पाँचौं स्थान ओगट्न सफल उनले दोस्रो पटक फेरी अर्को दौडमा भाग लिए जुन जनवरि १९ मा आयोजना गरिएको थियो । त्योपनि हिउँमाथि नै थियो । यसमा उनले ठूलै लावालस्करलाई उछिनेर तेस्रो स्थान हाँसिल गर्न सफल भए । ‘पहिलो अनुभव कस्तो होला होला भन्ने धुकचुक र मनमा शंका थियो । तर मलाई औधि मन पर्यो’ साङ्गेले छोटो अनुभव सुनाए ‘हिउँमा दगुर्न गाह्रो भएपनि मज्जा आउने रैछ ।’
मार्च महिनाबाट चाहिँ साँच्चिकै कडा प्रतिस्पर्धा शुरु भयो । फ्रान्सको दक्षिणी भेगमा यस्ता अनेकौं प्रतिस्पर्धा हुन थाले । साङ्गे पनि त्यसमा भाग लिन ब्यस्त भए । तिन मार्चमा थेल द मों गि भन्ने प्रतिस्पर्धा थियो, २७ किमी लामो । उनले यसमा दोस्रो स्थान हाँसिल गरेर सबैलाई चकित पारे । गएको सप्ताहन्तमा झन गज्जबको प्रतिस्पर्धा थियो । राती दौडिने । रातीको २० किमी लामो दौड जितेका साङ्गेले अर्को दिन बिहानै फेरी ३४ किमीको दौडमा भाग लिए । यसमापनि उनले तेस्रो स्थान जमाए । साङ्गेले जति सफलता पाउँदै गए उति स्थानिय सञ्चार माध्यमहरुमापनि छाउने गरेका छन् ।
आउने सप्ताहन्तमा उनले अर्को अन्तर्राष्ट्रिय दौड प्रतियोगितामा भाग लिँदै छन् । त्यसमा सयौं धावकहरु हुने छन् । ला थ्रेल दु भँतु नाम राखिएको त्यो प्रतियोगिताका लागि ४६ किमी राखिएको छ । त्यसमा सयौं धावकहरु हुने छन् । सहभागि हुने मध्ये धेरै त अन्तर्राष्ट्रिय स्तरमा नाम कमाइसकेकापनि सहभागि हुने छन् । साङ्गे यसमा उत्क्रिस्ट १५ जना मध्ये पर्ने उद्देश्यले मरिमेटिरहेका छन् । ‘यो मेरा लागि चुनौतिपूर्ण र अवशर दुबै हो, म अहिले कसरि टप १५ जनाभित्र पर्ने भनेर सोचिरहेको छु’ उनले सुनाए । यो त साङ्गेको यो वर्षका लागि शुरुवात मात्रै हो । फ्रान्सको दक्षिणी क्षेत्र जुन हिमाल र डाँडाकाँडाले भरिएको छ । त्यस क्षेत्रमा यस्ता प्रतियोगिताहरु प्रशस्त हुने गर्छन् । यो गर्मी यामभरि त्यस्ता दर्जनौं प्रतियोगिताहरु राखिएका छन् । साङ्गे शेर्पाले ति अधिकांशमा सहभागि हुन आफ्नो नाम दर्ता गरिसकेका छन् ।
ति मध्ये कतिपय प्रतियोगिता भिराला, चट्टान, खोल्सा खोल्सी र ठाडो उकालो, जंगलहरुमा राखिएको छ । यसरि राख्नुको उद्देश्य कठिन क्षेत्रमा प्रतियोगिता गराउनु हो, सम्म ठाउँको अभावले होइन । फ्रान्सेलीहरु विश्वमै साहसिक र कठिन यात्रा, प्रतिस्पर्धा र रमाईलोकालागि चुनौति खेप्ने नागरिकका रुपमा चिनिन्छन् । साङ्गेको आगामी प्रतियोगिता सफल होस् । टप १५ होइन पहिलो दोस्रोमै परुन भन्ने धेरै धेरै शुभकामना !!
साङ्गे शेर्पा संवन्धी अघिल्ला लेखहरुपनि हेर्नुस्
फ्रान्सको दौड प्रतियोगितामा नेपाली साङ्गे फेरी तेस्रो
