कविता : सुन्यता

● नवराज न्यौपाने  / ताइपेइ, ताइवान

टिलपिल टिलपिल गर्दै चम्किने ताराहरु

अस्तित्वमा हुँदापनि

बादलको घेरामा कैद भए जस्तो

एक स्वच्छ गगनको खोजीमा ||

++++++++++++++++++

फिरफिर फिरफिर गर्दै हल्लिने पिपलका पातहरु

हावाको क्षणिक प्रतिक्षामा हुँदापनि

सारा लोकमै सन्नाटा छाएजस्तो

एक सर्को वायुको खोजीमा    ||

++++++++++++++++++

ढुकढुक ढुकढुक गर्दै धड्किने मुटुहरु

मानव चोलामा हुँदापनि

बाच्नुको अर्थ नबुझे जस्तो

एक जीवन दर्शनको खोजीमा   ||

 ++++++++++++++++++

 मन को बह पोख्न नपाएर

औडाहा हुँदापनि

देखावटि दैनिकी दौडाहामा कुदे जस्तो

एक क्षण मौनताको खोजीमा  ||

 ++++++++++++++++++

 बिचारका ज्वारभाटालाई चिर्दै

आफ्नै धड्कन को गति नाप्दा

सुन्यता भित्रको सुन्यतामा बिलिन भए जस्तो

एक स्वछन्द शान्तिको खोजीमा  ||