थाकी सके आँखाका यी नानी
-उमादेवी
कुर्दा कुर्दै थाकी सके, आँखाका यी नानी पनि
छिट्टै आउन परदेशी दाई, मर्छे तिम्री रानी पनि !
शान्त भा‘ छ गाऊ अचेल स्याल शहर पसे पछि
छिट्टै आउन परदेशी दाई, बाबा भन्छे सानी पनि !!
आमा आँखा देख्नुहुन्न, छोरा भन्छिन बटुवा लाई
छिट्टै आउन परदेशी दाई, निल्नै छाडीन पानी पनि !!!
छोरा भेट्ने आशा मार्दै, बुबा आँशु झार्नुहुन्छ
छिट्टै आउन परदेशी दाई, होला कुराकानी पनि !!!!
जस्तो छाड्यौ उस्तै छू म, विवाहित कुमारी झै‘,
छिट्टै आउन परदेशी दाई, उसै बित्यो जवानी पनि !!!!!
बिछ्यौनमा नपल्टँदै, झर्छ आँशु सम्झिएर
छिट्टै आउन परदेशी दाई, कस्तो लायौ बानी पनि
कुर्दाकुर्दै थाकी सके, आँखाका यी नानी पनि !!!!!!
०३, देवीपथ, हेटौडा-मकवानपुर
हाल-साउदी अरेबिया ।