हामी हौं नेपाली
-दिलिप योन्जन /अस्टिन, अमेरिका
देशको तापले पग्लियो हिमाल, हामी झैं रोएर
सकिन्न कहिले युद्धको पिडा, आसुले धोएर
मार्नु र मर्नुले बन्दैन देश, बुझ है नेपाली
मार्नु र मर्नु त्यागेर भनौं, हामी हौ नेपाली।
°°°°°°°°°°°°°°°°°°°°°
आमालाई रुवाई यो भुमी रंगाइ नगरौं है हत्या
आफ्नो देश आफैं आगोले सल्काई नदेखाउ बिरता
मतभेद त्यागी बैरिभाव छोडी बनाउ है नेपाल
मार्नु र मर्नुले बन्दैन देश, बुझ है नेपाली
मार्नु र मर्नु त्यागेर भनौं, हामी हौ नेपाली।
°°°°°°°°°°°°°°°°°°°°°
बिरता देखाई नहँसाउ सत्रु दाजु-भाई लडेर
हिमाल झैं अग्लो अटल बिश्वास मेटिन्न मेटेर
चम्किलो सुर्य हातले कहिले छेकिन्न छेकेर
मार्नु र मर्नुले बन्दैन देश, बुझ है नेपाली
मार्नु र मर्नु त्यागेर भनौ, हामी हौ नेपाली ।
