माओवादी घेराउले सिहंदरबार छिर्नै सकेनन मन्त्री
माओवादीले सिंह दरबार घेराउ गर्ने घोषणा गर्नासाथ सरकार कडा रुपमा प्रस्तुत हुने संकेत थियो । रातारात बैठक बसे सरकार संचालन गर्ने दलका । सुरक्षा निकायलाई निर्देशन दिईयो । नेपाली सेनालाईपानी सतर्क रहन निर्देशन थियो । सरकारले पहिले तोकिएको निषेधित क्षेत्र अझ बढायो माओवादीको सिंह दरबार घेराउ असफल पार्न । तर त्यसो गरे झन पुरै निषेधित क्षेत्र तोड्ने धम्की माओवादीले दिएपछि सरकार पछाडी हटेर पुरानै निषेधित क्षेत्र कायम गर्र्यो ।
तर माओवादी र सरकारको जुहारी टुन्गिएन । माओवादीले बिहान आठ बजेदेखि उता कुनैपनि कर्मचारीलाई सिंहदरबार छिर्न नदिने दाबी गरे । उता सरकारले जोरी खोज्नैकालागी मंगलबार राखेको मन्त्री परीषदको बैठक बुधबार लाई सार्र्यो । अनि दाबी गर्र्यो-जुन सुकै मूल्य चुकाएरपनी मन्त्री परीषदको बैठक फत्ते गरिन्छ । उता माओवादी उपाध्यक्ष बाबुराम भट्टराईले सरकारलाई जवाफ फर्काए-८ बजेपछि कुनैपनि हालतमा मान्छे त के मुसो पनि छिर्न दिईन्न । सिंहदरबार छिर्नेनै हो भने सुरुंग बनाएर छिरे हुन्छ । माओवादी र सरकारको दोहोरी चलीनै रह्यो । तर भयो के ? आखिरमा त्यत्रो सुरक्षा निकाय हुँदाहुँदै पनि सरकारले मन्त्री परिषदको बैठक गर्न सकेन ।
त्यति मात्रै हो र ? सरकारले सिंह दरबार भित्र काम गर्ने सबै कर्मचारीलाई अनिवार्य उपस्थित हुन भन्दै उर्दी जारी गर्र्यो । त्यो मान्न कोहि कर्मचारी बिहानै आँखा मिच्दै ६ बजेनै पुगेछन । माओवादी घेराउ शुरु हुनु अगावै । कोहि अझ टाढा बस्नेहरु चाहि अघिल्लो दिननै आफन्तकोमा गएरपनि बसेछन । मन्त्री परिषद बैठक बस्ने भनेपछि झन कर्मचारीलाई मानसिक दबाब पर्र्यो नगई नहुने । सुरक्षा निकायलाई सबै मन्त्रीहरुलाई सकुशल भित्र छिराउने आदेश दिईएकोथियो । तर के गर्नु सरकारले १० हजार सुरक्षाकर्मी खटाऊँदापनि मन्त्रीहरुलाई भित्र छिरौं सकेनछ ।
आन्दोलनलाई आआफ्नो परिभाषा अनुसार शान्तिपूर्ण वा अशान्तिपूर्ण भन्न सकिन्छ । किनभने आठ ठाउँ भन्दा बढी नाकाबाट देशको प्रमुख प्रशासकीय केन्द्र घेराउ गर्दा ठूलो हत्या हिँसा भएन । तर पूर्ण रुपमा शान्तिपूर्णपनि किन भएन भने सांझपख सिंहदरबारको दक्षिणी गेटमा माओवादी आन्दोलनकारी र सुरक्षाकर्मीहरु बिच झडप हुँदा माओवादीका केहि नेता र कार्यकर्ता घाईते भए । माओवादीका नेता अमिक शेरचनको हात भाँच्चियो । पम्फा भूसाल र कृष्ण बहादुर महरा घाईते भए । अन्य केहि माओवादी कार्यकर्ता राजधानीका विभिन्न अस्पत्तालमा भर्ना भएका छन् । प्रहरीले चलाएको रबरका गोली लागेर घाईते हुनेहरु दर्जनौं भएछन ।
सधैं झैँ, माओवादी कार्यकर्ताहरु पुरा बाजा गाजा, नृत्य देखाएर खुब मनोरन्जनात्मक तरिकाले घेराउमा बसे । यो घेराउलाई माओवादीले विशाल सफलता र सरकारी हार भनिसकेका छन् । उनीहरुको भनाईमा लाखौँ जनता उत्रिएर प्रमुख प्रशासनिक केन्द्रनै घेरे । र मन्त्री परीषदको बैठक गर्छौं भनेर पूर्व घोषणा गर्दा पनि सरकारले सकेन । त्यो भनेको ‘यो कठपुतली सरकार प्रतिको’ जनताको अविश्वास हो रे । भोलीपनि माओवादीले सिंहदरबार घेराउ जारी राख्ने भनेका छन् । आज त शान्तिपूर्णनै भयो आंशिक घटनालाई छोडेर भोलीको कस्तो हुने हो ?
