महामहिम बाजे र ठुल्घरे दिदि

● कुल मगर / बेल्जियम

हाम्रा घर (जनजाती महासंघ) मा बिशेष पाहुना बाजे नै
खोसिएको हाम्रा अधिकारहरु थोरै मात्र के सुनायौं    !
न थियो रे नेपाल न थियो रे ”जाती र पाती”
अनाहकमा खानु सम्म बाजेको मुखको गाली खायौं !!

००००००००००००००००

बाबै कस्तरी गर्जेको हाम्रा बाजे ठुल्घरको वार्षिकीमा
गर्जिनु गर्जे ठुल्घरे (एन आर एन) दिदी पनि बाजेसँगै   !
मत चकित, नराम्रोलाई नराम्रो भन्नै नहुने रे,
जहाँ भेट्यो त्यहि गर्जिन्छ बाजे  के हो ? अचम्मै !!

००००००००००००००००

तिमरका गर्जन कुनै क्षणिक आवेश मात्र पक्कै होइन
कयौं कपट र षडयन्त्रको चित्रहरु छर्लंग चित्रित हुँदैछ  !
समानताको एउटा माला उन्नु भन्दा बिभाजनको
पिडाले बाजेले भन्ने ‘’जाती पाती’’ लाइ झन् झन् छुँदैछ !!

००००००००००००००००

भाङ्ग्रा, छिटको गुन्यु, ढाका चोली, आंगी र लंगुटी बस्त्र होइन रे,
तमु मगर शेर्पा थारु राई लिम्बु आदि जात (नेशन) होइन रे      !
जगतले दिएको हाम्रो पहिचान बाजेको पुराणमा लेख्या छैन रे,
त्यसैले बाजे भन्छन हाम्रो पहिचान त पहिचान नै होइन रे   !!

००००००००००००००००

गर्जनेहरुले खायो संबिधान सभा, तुहियो संविधान पनि

संकट तिमेरले निम्त्यायौं बाजे टारेर के टर्ला र खोइ !

एकल जातीय पहिचान त यसरी जाग्यो नि अब

कपट षडयन्त्र र गर्जनले मार्न खोजेर के मर्ला र खोइ !!

००००००००००००००००

बाजे ! हुनेखाने र हुँदा खानेमा अन्तर नै यहि हो

तिम्ले खाने मासिक भत्ता हाम्रो पनि रगत पसिना हो  !
अधिकारले पूर्ण अनि समानताले सजिएको एकल जातीय

पहिचान सहितको नयाँ नेपाल हाम्रो  सपना हो !!