प्रचण्डमाथि प्रमद्वारा अंग्रेजीमा प्रहार

[मैले हिजो मात्रै प्रधानमन्त्रि पदबाट हटेलगत्तै गिरिजाप्रसाद कोइरालाले फेरि आफैं प्रधानमन्त्रि बन्न षडयन्त्र गर्न लागेको समाचार लेखेको थिएँ । आज जनआस्था साप्ताहिकका सम्पादक किशोर श्रेष्ठले जनआस्था वर्ड फाइलमा पठाए । पढ्दै गएको त हिजो मैले लेखेको ” राजिनामा लगत्तै प्रधानमन्त्रि बन्न अर्को षडयन्त्रको योजना” शिर्षकको समाचारलाई पुष्टि हुने एउटा समाचार रहेछ जनआस्था (८  साउन २०६५ बुधबार) मा । जनआस्था यसैपनि राजदरबार, सेना र प्रधानमन्त्रि निवासका समाचारमा झन विश्वसनिय मानिन्छ ।

यसमा गिरिजा आफु राष्ट्रपति हुन नपाएकोमा प्रचण्डसित चुर भएको, राजाले फेरी शक्ति हत्याउन दुष्प्रयास गर्न खोजेको लगायतका केही महत्वपूर्ण प्रसंग छन । रमाइलो त के छ भने आफ्नो पार्टीले सर्वनाक हारेर पनि लाज मान्नुको साटो, जिम्मेवारी लिनुको साटो “म प्रचण्डलाई प्रधनामन्त्रि हुन दिन्न ” भनेका छन गिरिजाले परिवारसँग । गज्जब छ बा, निर्वाचनमा जित्नेलाई प्रधानमन्त्रि हुन दिन्न रे, गिरिजाकै ठेक्का जस्तो यो देश त ! कसलाई के दिने नदिने सबै गिरिजाकै तजबिजमा रे !] । बाँकी जनआस्थाकै तलको समाचार हेर्नुहोस— 

प्रचण्डमाथि प्रमद्वारा अंग्रेजीमा प्रहार 

काठमाडौं । गणतन्त्र नेपालको पहिलो राष्ट्रपति बन्न असफल भए पनि प्रधानमन्त्री गिरिजाप्रसाद कोइरालामा सत्ताको तिर्खा अझै मेटिएको छैन । उहाँले पुनः प्रधानमन्त्री बन्ने अभिलाषा राख्नुभएको छ । ‘सबैले मलाई प्रधानमन्त्री बन भन्छन्, म के गरू ? -‘ अस्ति सोमबार परिवारका सदस्यहरूसँग उहाँले यसै भनेर सल्लाह माग्नुभयो । आफू बन्ने आधार पेस गर्दै कोइरालाले भन्नुभएको थियो– ‘एमालेसँग मेरो कुरा भइरहेको छ, साना पार्टीलेपनि सहयोग गर्छन्, म प्रम हुन सक्छु ।‘    आफूलाई राष्ट्रपति बन्न नदिएकोमा कोइरालाको आक्रोश माओवादी अध्यक्ष प्रचण्डप्रति निकै कडा थियो । प्रचण्डलाई आफूले सकेसम्म प्रधानमन्त्री बन्न नदिने उहाँले बताउनुभयो । स्रोतका अनुसार आफू राष्ट्रपति बन्नबाट रोक्नमा प्रचण्ड नै मुख्य जिम्मेवार भएको आरोप उहाँको थियो । ‘उसले मलाई राष्ट्रपति बन्न नदिएपछि मैले मात्रै उसलाई किन प्रधानमन्त्री बन्न दिने ?’ कोइरालाको भनाइ उद्धृत गर्दै स्रोतले भन्यो । आफू प्रम बन्न नसकेर माओवादीलाई नै बनाउनुपर्ने अवस्था आए प्रचण्डबाहेक अर्को व्यक्ति खोजिने जानकारी पनि कोइरालाले दिनुभएको थियो । अंग्रेजी भाषामा कोइरालाले माओवादी अध्यक्ष प्रचण्डलाई ‘बेबकुफ‘ को संज्ञा दिएर मनको तुष पोख्नुभएको थियो । बालुवाटार स्रोतका अनुसार कोइरालाले अंग्रेजी भाषामा भन्नुभयो– ‘ही (प्रचण्ड) हिमसेल्फ इज एन इडियट, हि डजन्ट ह्याभ पावर इन पार्टी‘ । आफू सत्तामा नरहने अवस्थाको कहालीलाग्दो वर्णनगर्दै कोइरालाले भन्नुभएको थियो– मलाई राष्ट्रपति बन्न दिएनन्, मलाई सेनाको दह्रो सपोर्ट थियो, म राष्ट्रपति बनेको भए सेफल्यान्डिङ गराउँथे“, तर अब शान्तिप्रक्रिया पनि अप्ठ्यारोमा पर्‍यो ।‘ नयाँ राष्ट्रपति रामवरण यादवलाई पनि निकै अप्ठ्यारो पर्ने दाबी गर्दै कोइरालाले मुलुक गृहयुद्धतिर गएको तर्क सुनाउनुभएको थियो । ‘केही समय यस्तै हो, त्यसपछि सेना अगाडि आउन सक्छ,’ परिवारका सदस्यहरूलाई र्सतर्क गराउँदै उहाँले भन्नुभयो । फेरि प्रम बन्ने स्थिति नआए पार्टी हाक्ने उहाँले बताउनुभयो । ‘म राष्ट्रपति नभएर राजनीति गर्न सजिलो भो, पार्टी हाक्ने अर्को मान्छे तयार बनिसकेकै थिएन,’ कोइरालाको भनाइ थियो ।  प्रम कोइराला जनमोर्चाका अध्यक्ष अमिक शेरचनसँग भने निकै खुसी हुनुहुन्थ्यो । अमिकसँगको आफ्नो गोप्य सहमति र्सार्वजनिक गर्दै उहाँले ‘म राष्ट्रपति भए अमिक उपराष्ट्रपति बन्नेगरी प्रयास गरिएको‘ जानकारी दिनुभयो । ‘मैले प्रकाश (नारायणकाजी श्रेष्ठ) लाई पनि मलाई राष्ट्रपतिमा सहयोग गर, तिमीलाई प्रम बनाउन म भूमिका खेल्छु भनेको थिएँ, तर उसले मानेन‘ उहाँले सुनाउनुभयो– भारतले धेरै खेल्यो ।  

नागार्जुनमा बसे पनि

 प्रम कोइरालाले नागार्जुनमा बसे पनि पूर्व राजा ज्ञानेन्द्र विल्कुल मौन नरहेको बताउनुभयो । ‘उनी भारतस“ग कुरा मिलाउँदै छन् भन्ने सुनेको छु‘- उहाँले निकटस्थहरूलाई सूचित गर्दै भन्नुभयो– ‘कि राजा इन्डिया जान्छन् कि भाजपा र कांग्रेस आईको उच्चस्तरीय टोली यहाँ आउँछ र राजासँग नेगोसिएसन गर्छ ।‘ नेगोसिएसन केका लागि भनेर कोइरालाले नखुलाए पनि राजालाई पुनः सम्मान दिएर फर्काउनेबारे भारतमा लबिङ भइरहेको जानकारी पाएको उहाँको भनाइ थियो ।