माओवादी सरकारका यि पनि त हुन नी सकारात्मक काम
(फर्वरी १२ मा माओवादीले एउटै गरेन राम्रो काम ? लेखको बाँकि भाग)
–रञ्जन
● भलै देशभरि सरकारले औषधी पुर्याउन त सकेको छैन नै तरपनि देशभरिका स्वास्थ्य चौकीहरुमा उपचार निशुल्क गराएको छ । कम्तिमा औषधी पुगेका ठाउँमा त गरिबले पैसा तिर्नु परेको छैन सानोतिनो उपचारका लागि । जहाँ औषधी पुर्याउन सकेको छैन सरकारले कम्तिमा त्यहाँ जनता “हामीलाई औषधी देउ” भन्दै आवाज त उठाएका छन । घच्घच्याएका छन र सरकारलाई औषधी पुर्याउन बाध्य पारेका छन ।
● पहिले एक त निकै कम जिल्लाबाट मात्रै बन्थ्यो राहदानी । अहिले सबैजसो जिल्लाबाट बन्छ । अनि कति तिरिन्थ्यो घुस एउटा पासपोर्ट बनाएको ? के घुस बिना बन्थ्यो पासपोर्ट ? अनि कति दिन, हप्ता र महिना धाउन लगाउँथे नाथे एउटा पासपोर्टको लागि ? अहिले के उस्तै छ त ? कम्तिमा पासपोर्ट त उहि दिन बन्छ जिल्ला जिल्लाबाट । अनि एक रुपियाँपनि घुस दिनु पर्दैन पासपोर्ट बनाउन । अपबादलाई छोडेर । अनि पासपोर्टका लागि कति नेताका दैला चहार्नु पर्थ्यो लौ न सिफारिस गरिदिनुपर्यो भन्दै । अनि नेपाली कांग्रेस वा एमाले समर्थक नभए त्यहि पाउनपनि कति मुस्किल पर्थ्यो ?
● त्यहि पासपोर्ट बनाएपछि बल्ल तल्ल बिदेश जान खोज्दा कति ठग्थे दलाल र मेन पावर कम्पनीहरुले ? म अहिले ठग्दैन भन्दिन । ठगिरहेका छन तर के त्यसमा कमी आएको छैन ? उल्लेख्यरुपमा कमी आएको छ पहिले भन्दा । कमसेकम एमाले र अझ खासगरि नेपाली कांग्रेसको जस्तो कित जिल्ला र स्थानिय तहकै नेता कार्यकर्ता संलग्न भएर ठग्ने कित तिनका नेताले ठगहरुलाई संरक्षण गर्ने त अहिले भएको छैन ।
● तपाईहरुलाई संझना छ एमाले र नेपाली कांग्रेस वा पञ्चेको सरकारले ईन्धनको मूल्य अन्तर्राष्ट्रिय बजारमा घट्दा बजारमापनि घटाएको ? अन्तर्राष्ट्रिय बजार भाउ बढ्यो भने बढाउने तर घट्यो भने कहिल्यै घट्थेन । तर अहिलेको सरकारले कम्तिमा अन्तर्राष्ट्रिय बजारमा घट्दा केहि घटाउने त गरेको छ । यति छोटो समयमा त्यसलाई समायोजन गर्न खोज्नुपनि त सकारात्मक कुरानै हो नी ।
● माओवादी सरकार आयो भने पर्यटन ब्यवसाय ध्वस्त पार्छन । कम्युनिष्टको सरकारलाई पैसा जाने भयो भने पर्यटक आउँदैनन् भनेर खुब हौवा पिटिन्थ्यो होइन ? तर माओवादी नेत्रित्वको सरकार बनेपछि झन पर्यटक बढे नी होइन ? माओवादीले सन् २०११ लाई पर्यटन वर्षका रुपमा मनाएर १० लाख पर्यटक नेपाल ल्याउने घोषणा गरेको छ । त्यसको लागि बिभिन्न तयारी गरिरहेको छ । बिमान खरिदलाई प्राथमिकता दिएको छ । पर्यटन सुधारका काम गरिरहेको छ । अनि पर्यटन ब्यवसायको पक्षमा को रहेछ माओवादी कि पहिलेका भ्रष्टाचारी सरकार ?
● अहिले सरकारले जलबिद्दुतको क्षेत्रमा केहि गर्न खोजिरहेको छ । आफैं आफ्नो खुट्टामा उभिन सक्ने नीति ल्याउन खोज्दै छ । जनताको प्रत्यक्ष लगानीमा बिद्दुतिय योजना ल्याउँदै छ । यो राम्रो होइन ? हिजो नेपाली कांग्रेस र एमालेले के गरेका थिए ? कमिसन खाँदै बिदेशीलाई दिँदै । ठेक्कामा कमिसन, लाईसन दिँदा कमिसन, निर्माण कंपनी छान्दा कमिसन । अहिले सरकारले पारदर्शी रुपमा जनताको प्रत्यक्ष लगानीमा गर्न खोज्दै छ र त कांग्रेसलाई हिजोको कमिसन संझेर पोलिरहेको छ । एमालेले हिजो सरकारमा बसेका बेलामा झैं खान पाएको छैन र त घुर्की र निहुँ खोजिरहेछ । नत्र के एमालेले अहिले भन्दा पहिले राम्रो गरेको थियो र आज गर्न नपाएकोले निहुँ खोजेको हो त ? अनि के फोरमका गच्छेदार र जयप्रकाश गुप्ताले राम्रो गर्न नपाएकाले घुर्की देखाउने गरेका हुन त ? हिजो झैं माओवादी संलग्न सरकारले लुट्न नदिएकाले उनीहरुलाई चित्त बुझिरहेको छैन ।
● माओवादीको नेत्रित्वमा सरकार बन्यो भने बिदेशीले एक पैसा दिँदैनन । नेपाली जनता नुन खान पनि नपाएर मर्छन भन्ने हल्ला खुब फिँजाएको थियो नेपाली कांग्रेसको सरकारले । के साँचो रहेछ त ? कसरि हिजो भन्दा आज धेरै कर उठ्दै छ । कसरि हिजो भन्दा आज बिदेशीले झन पत्याएका छन ? के त्यसरि नपत्याएको भए पहिलेको भन्दा झन ठुलो बजेट घोषणा गर्न संभव हुने थियो त अहिलेको सरकारलाई ? बिदेशीले पत्याउँदैनन भनिएको सरकारलाई झन बढि पत्याउनु सकारात्मक पक्ष होइन ? बरु नेपालीं कांग्रेसको सरकारलाई पो कम पत्याएका रहेछन त होइन ?
● नेपाली कांग्रेस र एमालेले देशका नदीनाला कति बेचे बिदेशीलाई ? आफ्नो भूमी र सम्पदा बेचेर दाम कुम्ल्याएका थिए । देशका असमान सन्धि संझौतालाई आफ्नो देश अनुकूल बनाउनुपर्छ भनेर आवाज उठाए ? तर हेर्नुस त माओवादी नेत्रित्वको सरकार बन्नासाथ प्रधानमन्त्री प्रचण्डले नेपालको हित बिरुद्द भएका असमान सन्धी संझौताहरु पूनर्मूल्यांकन गरेर दुई देश अनुकूल हुनुपर्छ भनेर दह्रो अडान राखे भारत समक्ष । भारतिय पक्षलाई त्यसमा राजीपनि गराए । यदि नेपाली कांग्रेस, फोरम र एमालेसमेत मिलेर माओवादीलाई साथ दिने हो भने राष्ट्रिय सहमती कायम गरेर अहिलेनै ति असमान सन्धि संझौता खारेज गर्न सकिने अवस्था माओवादीले बनाएको छ । आफ्नो राष्ट्रियता र राष्ट्रिय हितकालागि यो भन्दा ठुलो काम अरु के हुन्छ ?
● कुनै एक परिवारवादको अन्त्य नी ? गिरिजाले हेर्नुस त कति भाँडे देश ? जहाँपनि गिरिजावाद । कोइरालाको पेवा जस्तो थिएन ? गिरिजा परिवार भनेपछि त हलो जोत्दै गरेको कुनै लठुवापनि हत्त न पत्त आएर मन्त्रीको कुर्सीमा बस्न पा उने । पार्टीमा स्थान पाउने । गणेशमान लाई रुवाएर होस कि भट्टराईलाई निकालेर होस । दमननाथलाई पाखा लगाएर होस कि नरहरीलाई अँचेटेर होस सधैं त्यहि कोइराला परिवारकै हालीमुहाली । के त्यो सेखी, त्यो धाक, त्यो बर्चस्व तोडेर केहि शिक्षा दिने काम माओवादीले गरेको होइन ? यसले के अरु पार्टी, सरकार, प्रजातान्त्रिक पद्दती र स्वयं नेपाली कांग्रेस पार्टीलाई फाईदा पुगेको छैन ?
● कांग्रेस जस्तो सबैभन्दा पुरानो पार्टी सधैं सत्तामा टाँस्सिइरहने तर केहि गर्न नसक्ने । प्रतिपक्षमा बस्नै नजान्ने, नसक्ने । उ प्रतिपक्षमा गयो । अब केहि सुध्रिन्छ कि त सिद्दिन्छ । उसले अस्तित्वका लागिपनि केहि सिक्नै पर्छ । सरकार बाहिर बस्ने के हो अब जान्दछ उसले । प्रजातान्त्रिक पद्दतीकालागि फाईदा पुग्छ यदि कांग्रेसले सत्ता बाहिर बसेर केहि सिक्यो र जिम्मेवार प्रतिपक्षको भूमिका निभायो भने । कांग्रेसलाई त्यो स्थितिमा पुर्याउने को त ?
यि त मुख्य अहिले तत्कालै देखिएका केहि सकारात्मक संकेत हुन् । माओवादी नेत्रित्वको अहिलेको सरकारका कमजोरीनै छैनन म भन्दिन । तर ति ज्यादै कम छन । माओवादी सरकारले ,यो भन्दापनि धेरै असल कामहरु गरेको छ । जनताले प्रत्यक्ष अनुभव गर्ने, रहत महसुस गर्ने कामहरु ल्याउन खोजिरहेको छ । छ महिनामै जनताका पक्षमा राम्रा नीतिहरु ल्याउनु राम्रो संकेत हो । केहि वर्ष काम गर्न दिए अवश्यै माओवादी नेत्रित्वको सरकारलेकेहि गरेर देखाउँछ। त्यसमा शंकै छैन । कम्सेकम दशौं वर्ष लुटेर खाएका एमाले र कांग्रेस पार्टीले छ महिनामै यो सरकारको आलोचना गर्न सुहाउँदैन । जनताले आलोचना गरेपनि । माओवादी सरकारले एमाले र कांग्रेसको पहिलेको सरकारलेझैं कम्सेकम राम्रो गर्न नसकेपनि नराम्रो गरेको छैन ।
● माओवादी सरकार आयो भने पर्यटन ब्यवसाय ध्वस्त पार्छन । कम्युनिष्टको सरकारलाई पैसा जाने भयो भने पर्यटक आउँदैनन् भनेर खुब हौवा पिटिन्थ्यो होइन ? तर माओवादी नेत्रित्वको सरकार बनेपछि झन पर्यटक बढे नी होइन ? माओवादीले सन् २०११ लाई पर्यटन वर्षका रुपमा मनाएर १० लाख पर्यटक नेपाल ल्याउने घोषणा गरेको छ । त्यसको लागि बिभिन्न तयारी गरिरहेको छ । बिमान खरिदलाई प्राथमिकता दिएको छ । पर्यटन सुधारका काम गरिरहेको छ । अनि पर्यटन ब्यवसायको पक्षमा को रहेछ माओवादी कि पहिलेका भ्रष्टाचारी सरकार ?
(प्राप्त लेखको आधा भाग सम्पादनकालागि सहयोग गरिदिने साथी दिपक बस्यालजीलाई धेरै धन्यावाद -नेपालप्लस) ।
