स्याबास आबुधाबीका प्रहरी हो, हाम्रा मन्त्रीको चेत खुलाइदिएकोमा !
हाम्रा पर्यटन मन्त्री लोकेन्द्र बिष्ट आबुधाबीको प्रहरी नियन्त्रणमा परे । अरुलाई दुख लागेहोला । मलाई त सारै स्वाद लाग्यो । दिल हाँस्यो । मन रमायो । ह्रिदय गदगद भयो । किन ? कुरो सोझो छ । धेरै नेपालीले यस्तै दुख कस्ट भोगेकाले त्यसको स्वाद हाम्रा मन्त्रीलेपनि चाख्न पाएकोमा ।
प्रशासनका हाम्रा चोर कर्मचारीहरुको नियतनै बिदेश जाने नेपालीलाई फसाउने, हेप्ने, कागज बिगारिदिने र दुख दिने हुन्छ । तिनले बिदेश जान लागेका नेपालीलाई यति हेप्छन् कि पासपोर्ट बनाउन गएदेखिको हेपाई शुरु हुन्छ । सर्वसाधरणले यति दुख भोगेका हुन्छन् कि यी मन्त्री भनाउँदाहरुलाई कुनै ज्ञान हुन्न नत मतलब नै गर्छन् ।
पासपोर्ट बनाउन जानुस् तपाइँ ठाडै घुस माग्छन् । नदिए के भन्छन् ? पासपोर्टको फोटोमा आँखा देखिएन, कान अलि कुच्चिएको देखियो किन ? पासपोर्टमा तपाइको नाम ह्र्स्व, नागरिकतामा किन दिर्घ ? यो तपाईनै हो भन्ने के ग्यारेन्टि छ ? सहि किन नागरिकता र पासपोर्टमा अलग ? आज हुन्न भोलि आउनुस् । आज हाकिम साप मिटिङमा हुनुहुन्छ । आज सिडियो सापको कुन्नि के पर्यो रे । केहि कारण चाहिन्न । बेक्कारमा दुख दिन्छन् यस्तै सोधेर ।
झगडा गरिगरि घुस नदिकनै पासपोर्ट बनाउन सफल भए अर्को तरिकाले दुख दिन्छन् । के गर्छन् ? जानि जानि त्यो घुस नपाएको झोंकमा पासपोर्टमा कुनै कुरा गलत लेखिदिन्छन् । दुख पाओस भनेर । बल्ल बल्ल पासपोर्ट बनाएर उड्यो । बिमानस्थलमा शुरु हुन्छ दुख दिन । घुस माग्न थाल्छन् । ‘तपाईको हाम्ले यत्रो काम गरिदियौं, टिकटमा रबर स्ट्याम्प हानिदियौं, झोला मिलाइदियौं, २० किलो भन्दा लान नपाउनेमा २५ किलो छिराइदिएँ, फर्म भरिदिएँ, केहि त चहियोनी। तपाइ लाखौं कमाउन बिदेश जने हाम्लाई नी चाहियो नी केहि त ।’ ठाडै माग्छन् ।
नदिए ? उहि हो कि त पासपोर्टमा केरमेट गरिदिने । डिपाचर स्ट्याम्प नै नहानीदिने । टेबलमुनि लुकाएर पासपोर्टको एक पन्नानै झिकेर फालिदिने । बिमान टिकटको एक पन्ना च्यातेर मिल्काइदिने । जब उड्छन् नेपाली हाम्रो बिमानस्थलबाट । तब अर्को देशमा पुगेर पाउँछन् सास्ति । भोग्छन् यातना । यस्ता कुरा नियन्त्रण गर्ने । निगरानी गर्ने । कडाई गर्ने । खराब कर्मचारीलाई कारवाही गर्ने कसले ? नीति नियम पालना भए नभएको जाँच्ने कसले ? मन्त्रालयले । मन्त्रीले होइन ? कहिल्यै गरेका छन् यस्तो ? सधै भाषण ठोक्ने, नेपालको ढुकुटी सिध्याएर मेला जाने, बिदेश घुम्ने । आफ्नो पासपोर्ट कर्मचारीलाई दियो उसले भिसा हानेर ल्यादिन्छ । राति पासपोर्ट शानले बोक्यो हिँड्यो । बिमानस्थलमा पुलिसले सर का सर लगाउँछ, भारि बोकिदिन्छ अनि बिशेष सिटमा गएर बस्यो । बिदेशमा बिमानस्थलमै लिन आउंछन् राजदूतहरु चाकरी ठोक्दै । तिसित चर्का चर्का कुरा गर्यो मोजमस्ति गर्यो । मेजमानि लियो । कार्यक्रममा फेरी भाषण ठोक्यो । स्वदेश फर्कियो। अनि नेपलीलाई नेपाली कर्मचारीले दिएको सास्ति यीनलाई मतलव छ ?
नेपालीलाई भनेपछि बिदेशी दुतावासका कर्मचारीले कसरि हेप्छन् । बिदेशी दुतावासमा काम गर्ने नेपालीलेनै नेपालीलाई कसरि मान्छे गन्दैनन् । मन्त्रीकै भिसामा केरमेट हुन्छ भने अरु साधारण नेपालीकोमा झन के होला ? कति ईज्जत रहेछ त हाम्रा मन्त्रीको ? अब हेक्का होला बल्ल हाम्रा मन्त्रीलाई ।
यसरि मन्त्रीनै परेपछि पो बल्ल हेक्का हुन्छ त कस्तो हुने रहेछ दुख । कसरि काम गर्ने रहेछन् तिनका कर्मचारीले । पुलिसले झ्याइँकुटी पार्दा कसरि मन खिन्न हुन्छ । नेपाली कर्मचारीको काम गराई कति लापर्वाहीपूर्ण छ ? अनि पो थाह हुन्छ हाम्रा मन्त्रीलाई । आफैं नपरेसम्म त तिनलाई चेतनै हुन्न । मतलब नै छैन । त्यसैले यी मन्त्रीले स्वाद पाए आफ्नो प्रशासन कस्तो छ भनेर । गजजबै भो । आबुधाबीका प्रहरीलाई लाखौं लाख धन्यवाद हाम्रा मन्त्रीको चेत खुलाइदिएकोमा ।
(तपाइका प्रतिक्रिया अपडेट हुन आज अलि बेर लाग्ने छ-नेपालप्लस)
