संबिधान नबनाई फ्रान्स आउने नेतालाई जुत्ताको माला ?
(कार्यवाहक राजदूत जिवन प्रकाश श्रेष्ठलाई ज्ञापनपत्र बुझाइँदै)
हामी नेपालीहरुको मन कति दुखेको रहेछ त ? कति रिसाएका रहेछन् हाम्रा नेता देखि ? शान्ति र संबिधान बेलैमा बनोस् भनेर हाम्रा राजनितिक दल र नेतालाई दबाब दिनको लागि ज्ञापनपत्र दिने कार्यक्रम थियो हिजो पेरिस स्थित नेपाली दुतावासमा । ज्ञापनपत्र दिईयो कार्यवाहक राजदूत जिवनप्रकाश श्रेष्ठ मार्फत ।
अनि त्यहाँ जनताका अगाडि संबिधान बनाउन गएका नेता भत्ता खाने, संबिधान नबनाउने, बिदेश भ्रमण गरेर पैसो र समय दुबै बर्बाद गर्ने भन्ने कुरो चल्यो । देशमा संबिधान बनाउने मूल कुरो बिर्सिएर देश बिदेश घुम्दै हिँड्ने नेतालाई के गर्ने त भन्ने सल्लाह भयो ज्ञापनपत्र बुझाउन जाने साथीहरुबिच। फ्रान्स आउनेलाई स्वागत नगर्ने, कार्यक्रम गर्न नदिने, सरिक नहुने तिनका कार्यक्रममा। बरु तिरस्कार गर्ने भन्ने साझा सहमती बन्यो । केहिले भने – यदि अब देखि संबिधान नबनेसम्म हाम्रा कुनैपनि सभासद र मन्त्री पेरिस् घुम्न आएभने तिनको घाँटीमा जुत्ताको माला लगाएर तिरष्कार गर्ने ।
कुनै साथीहरुको तर्क चाहिँ कालो झण्डा देखाउने भन्ने थियो । आखिरमा धेरैले जुत्ताको माला लगाइदिने भन्न थाले । जे होस, कुनैपनि नेतालाई अब देखि बहिष्कार गर्ने सहमती भयो । राजदूत श्रेष्ठ मार्फत दुई सय जना भन्दा बढिको हस्ताक्षर सहितको ज्ञापनपत्र बुझाइयो। अनि देशको अवस्था अनुसार अब झन ब्रिहद खालको बिरोध कार्यक्रम गर्नुपर्छ भन्ने अनौपचारिक सल्लाह गर्न पनि भ्याइयो । देशको अवस्था अनुसार जस्तो कार्यक्रम गर्नुपरेपनि पछादि नहट्ने भन्ने धेरै साथीहरुको जोड रह्यो । राजदूत श्रेष्ठले हाम्रो ज्ञापनपत्रलाई यथासक्य छिटो राष्ट्रपतीको कार्यालय, सभामुख, प्रधानमन्त्री र तिन प्रमुख राजनितिक पार्टीका कार्यालयमा पुर्याइदिने बचन दिए।
-शान्ति र संबिधानकालागि आज पेरिसस्थित नेपाली दूतावासमार्फत बुझाइएको ज्ञापनपत्र हेर्नुस जस्ताको तस्तै-
मे ७, २०१० (बैशाख २४, २०६७)
सम्मानिय संबिधान सभा अध्यक्ष ज्यू,
संबिधान सभा
संसद भवन काठमान्डौँ
मार्फत
नेपाली दूतावास
पेरिस, फ्रान्स
बिषय: मुलुकको गतिरोध अन्त्य गरी समयमै संबिधान निर्माण गरियोस ।
देश र जनताको भलाइलाई प्रमुख उदेश्य मानेर गरिएको जनआन्दोलन २०६३ को मर्म अनुसार यतिबेला राजनीतिक पार्टीहरुले काम नगरिरहेको अबस्था यहाँलाई बिदितै छ । नया संबिधान निर्माण गरि र एक दशक भन्दा लामो द्वन्दलाई दीगो शान्तिमा परिणत गराउनका लागि देशमा शहिदहरुले गरेको बलिदान, स्वदेश तथा बिदेशमा रहेका नेपालीहरुले खेलेको भूमिकापनि यहाँलाई बिदितै छ । बिपरीत सिद्दान्त र उद्देश्य बोकेपनि नेपालीका राजनीतिक पार्टीहरुले साझा र महत्वपूर्ण सवालहरुमा सहमती कायम गरेर अगाडी बढ्ने बुद्दिमत्तापूर्ण निर्णय उतिबेलै गरेका हुन् । संवाद र सहमतीको राजनीति अनुसार नेपालमा संबिधान सभा चुनाबपछि संबिधान लेखनको सबाललाई ओझेलमा पारेर यतिबेला राजनीतिक दलहरु सत्ताकालागि लँडाइ र झै झगडा गरिरहेका छन् ।
जनताले नयाँ संबिधान बनाउनकालागि संबिधान सभामा पठाएका सभासदहरु समेत सँबिधान लेखनलाई भुलेर सत्ताकै खिचातानीमा अल्झिएको देखिएको छ । आ – आफ्ना अडानहरु त्यागेर राजनीतिक पार्टीहरुबिच संबाद र सहमती जरुरी रहेको यस अबस्थामा मुलुकलाई फेरी जबरजस्त द्वन्दमा फसाउने अबस्थाको सृजना गरिएको छ । जसले गर्दा हामी प्रबाशमा रहेका नेपालीहरु अत्यन्त मर्माहत भएका छौँ । देशलाई रगत र तिक्तता तथा संबैधानिक रिक्तता होइन जनमुखी संबिधानको जरुरत छ ।
बिगतमा जस्तै राजनीतिक दलहरुबिच सौहार्दता कायम होस र सहमती अनुसार समयमै संबिधान निर्माण गर्ने बाटो राजनीतिक दलहरुले खोलुन् भन्ने हाम्रो चाहना छ । त्यसैले सम्माननिय संबिधान सभा अध्यक्षज्यूलाई हामीले सम्पूर्ण फ्रान्सबासी नेपालीको नागरिक समुहका तर्फबाट मुलुकमा शान्ति कायम गरि सबिधान निर्माणको मार्ग प्रसस्त गर्न राजनीतिक पार्टीहरुबिच सहमति कायम गरियोस भनि नेपाली दूताबास पेरिस मार्फत यो ज्ञापन पत्र पेश गरेका छौँ ।
यहि ज्ञापन पत्रमार्फत हामीहरु यो कुरा स्पष्ट गर्न चाहन्छौँ कि देशमा नया सँबिधान नबनुन्जेल फ्रान्सको भ्रमण गर्ने सभासद तथा उहाँका कार्यक्रमहरुलाई हामीले बिरोध र बहिष्कार गर्ने छौँ । हाम्रो चाहना र मर्म अनुसार काम गरिदिनुहुनेछ भन्ने आशा र धन्यवादका साथ ।
भवदीय
नेपाली नागरिक समुह, फ्रान्स
बोधार्थ
-सम्मानिय राष्ट्रपति ज्यू
राष्ट्रपतिको कार्यालय, शीतल निवास, काठमान्डौँ
-सम्मानिय प्रधानमन्त्री ज्यू
प्रधानमन्त्रीको कार्यालय, सिंहदरबार काठमान्डौ
-सम्पूर्ण माननिय सभासद
सिंबिधानसभाको कार्यालय काठमान्डौ
-एनेकपा माओवादी, केन्द्रिय कार्यालय काठमान्डौ
-नेकपा एमाले, केन्द्रिय कार्यालय काठमान्डौ
-नेपाली कांग्रेस, केन्द्रिय कार्यालय, काठमान्डौ
